མི་ལོ་སུམ་ཅུའི་གོང་དུ་ང་རྒྱ་གར་དུ་འབྱོར་ཅིང་། ངས་རྒྱ་གར་གྱི་སྲང་ལམ་ཉུལ་ནས་རྒྱ་གར་གྱི་ཇ་འཐུངས། བོད་པ་རྣམས་ཀྱིས་རྒྱ་གར་གྱི་ཇ་འདི་ལ་ཇ་མངར་མོ་ཞེས་འབོད། ལས་ཁུངས་ཆེ་ཁག་ལ་བཅར་སྐབས་ཀྱང་ཇ་འདྲེན་ལ། སྲང་ལམ་ཁུག་ཀྱོག་ལ་བསྐྱོད་ནའང་ཇ་ཚོང་ཁང་ཡོད། མེ་འཁོར་ནང་དུ་ཞུགས་སྐབས་ “ཇའེ། ཇའེ། ཇའེ”ཞེས་བོད་ཀྱི་དབུ་མཛད་རྣམས་ཀྱི་སྐད་གདངས་ལ་འགྲན་འཛུགས་པའི་ཇ་ཚོང་པའི་སྐད་དེ་ཐོས་ཡོང་། མདོར་ན་ཇ་ཚོང་ཁང་མེད་པའི་རྒྱ་གར་གྱི་ས་ཞིག་ཡིད་ལ་འཆར་དཀའ་ལ། བསམ་བློ་ཡེ་ནས་མ་བཏང་བའི་འཆར་སྣང་ཞིག་ལ་མར་པ་ལོ་ཙ་བ་ཡང་ཇ་སྟེགས་ཤིག་ཏུ་བཞུགས་ནས་ཇ་མཆོད་བཞིན་པའི་སྣང་བ་ཞིག་ངང་གིས་ཡོང་བར་བྱེད།

༢༠༡༦ ལོའི་ཟླ་ ༧ ཚེས་ ༡༥ ཉིན་གྱི་གསར་འགྱུར་ཞིག་གི་མགོ་བརྗོད་དུ་འདི་ལྟར། “རྒྱ་གར་དང་དབྱིན་ཡུལ་གྱི་བཏུང་བ་ཕུན་ཚོགས་དེའི་རྒྱབ་ཀྱི་ལོ་རྒྱུས་ནག་པོ་”ཞེས་བྲིས་འདུག ང་ཁོམ་སྐབས་དང་བསྟུན་ནས་གསར་འགྱུར་དེ་ལན་གཅིག་བཀླགས་པ་ཡིན་ལ། དེ་ནས་དེའི་བརྗོད་བྱ་དེ་ནམ་ཡང་སེམས་ནས་ཡལ་དཀའ་བར་གྱུར། དེ་ཡང་གཙོ་བོ་ནི་རྒྱ་གར་ལ་ཇའི་ལོ་རྒྱུས་རིང་པོ་མེད་པ་དེ་ཡིན། ནུབ་ཕྱོགས་སུ་ཇ་ཇི་ལྟར་འཕེལ་བའི་གཏམ་རྒྱུད་དེ་འཆད་པའི་ཡིག་རིགས་ཧ་ཅང་མང་བར་སྣང་ལ། ཇའི་ལོ་རྒྱུས་རྒྱུ་མ་ཕུ་འདེད་བྱས་ཚེ་འཛམ་གླིང་གི་ལོ་རྒྱུས་ཀྱང་འཆད་ཐུབ་པའི་ཚོད་དུ་སྣང་། དེས་ན་འདིར་བོད་ཀྱི་ལོ་སར་ཤར་ལ་ཉེ་བའི་སྐབས་དང་བསྟུན་ནས་རྒྱ་གར་གྱི་ཇ་མངར་མོའི་ལོ་རྒྱུས་དེ་རོབ་ཙམ་ངོ་སྤྲོད་བྱེད།

རྒྱ་ནག་ཏུ་ལོ་ངོ་སྟོང་ཕྲག་རིང་ཇ་འཐུང་བཞིན་ཡོད་པ་དང་། འཛམ་གླིང་གི་སྐད་མང་པོའི་ཇའི་སྐད་དོད་ཀྱང་རྒྱ་ནག་གི་སྐད་ལས་མཆེད་པར་གྲགས། དུས་རབས་བཅུ་བདུན་པའི་ནང་དབྱིན་ཇི་གཙོ་བའི་ཡུ་རོབ་པའི་ཚོང་པ་དང་ཆོས་པ་རྣམས་རྒྱ་ནག་ཕྱོགས་ལ་ཕྱིན་ནས་ཚུར་འཁོར་སྐབས་ལག་སྐྱེས་ཀྱི་ཚུལ་དུ་ཇ་དབོར་འདྲེན་བྱེད་མགོ་བཙུགས། དེ་ནས་ཡུ་རོབ་པ་རྣམས་ཀྱིས་ཇ་དེ་ཐོག་མར་སྨན་སྣ་ལྟ་བུ་ཞིག་དང་དེ་ནས་བཏུང་བའི་ཚུལ་དུ་སྤྱད་ཅིང་། ཇའི་བཏུང་བ་ཞེས་སྙན་པ་རྒྱས་ནས། ཇའང་འཚིག་ཇ་ཁང་གི་ཟས་ཐོའི་གྲས་སུ་སླེབས། རིམ་གྱིས་ཡུ་རོབ་ཀྱི་རྒྱལ་ས་དག་དང་། བྱང་ཨ་མི་རི་ཀའི་ནིའུ་ཡོག་གྲོང་ཁྱེར་(སྐབས་དེ་དུས་ནིའུ་ཨམ་སི་ཊར་ཌམ་ཟེར་)ལའང་སླེབས་ཏེ་བཏུང་བ་གྲགས་ཆེན་ཞིག་ཏུ་གྱུར། ཡུ་རོབ་པ་རྣམས་ཀྱིས་ཇ་ཚོང་བྱེད་པའི་ཐོག་མའི་དུས་སྐབས་སུ་ ཌ་ཆིའི་ཚོང་པ་རྣམས་གྲགས་ཆེ་བ་བྱུང་ཡོད་འདུག ཕྱི་ལོ་ ༡༦༥༧ ལོར་སྐུ་ཞབས་ཐོ་མ་སི་ གྷེ་ར་ཝེ་ཞུ་བ་ཞིག་གིས་དབྱིན་ཡུལ་དུ་ཇ་ཁང་ཐོག་མ་དེ་སྒོ་ཕྱེས་ཡོད་འདུག་ལ། ཁོའི་ཇ་རྣམས་ནི་ཌ་ཆི་པ་རྣམས་ཀྱིས་ནང་འདྲེན་བྱས་པ་ལས་བྱུང་བ་ཡིན་འདུག

ཌ་ཆིའི་ཚོང་ལམ་སྟོན་པའི་ས་ཁྲ་ཞིག

ད་དུང་སྐབས་འདི་ཙམ་ལ་པོར་ཅུ་གྷལ་གྱི་རྒྱལ་པོའི་སྲས་མོ་མཚན་ལ་ Catherine of Braganza ཞུ་བ་ཞིག་དབྱིན་ཇིའི་རྒྱལ་པོ་ Charles IIལ་གཉེན་བསྒྲིགས་པ་དང་། སྲས་མོ་འདི་ཉིད་ཇ་ལ་མཉེས་པའི་རྐྱེན་ལ་བརྟེན་ནས་ཀྱང་དབྱིན་ཡུལ་དུ་ཇའི་བཏུང་བ་འཕེལ་བ་དང་ཕྱི་དྲོའི་ཇ་ཞེས་པའང་སྲས་མོ་འདིས་སྲོལ་བཏོད་པའི་གཏམ་རྒྱུད་ཅིག་ཀྱང་འདུག འོན་ཀྱང་རྒྱལ་པོ་འདིའི་སྐབས་སུ་དབྱིན་ཡུལ་དུ་ཇ་ནང་འདྲེན་གྱིས་བཙོང་རྒྱུ་ལ་དགག་བྱ་བྱས་ཤིང་ཇ་ལ་ཁྲལ་ཆེན་པོ་སྤྲོད་དགོས་པ་བཟོས་ཤིང་། རྒྱ་གར་དབྱིན་གཞུང་གིས་ཇའི་ཚོང་ལ་སྟངས་འཛིན་བྱས་འདུག་པ་བཅས་ཀྱི་རྐྱེན་ལས་ཇ་ནག་ཚོང་བྱེད་རྒྱུའང་འཕེལ་ཡོད་འདུག དུས་རབས་བཅོ་བརྒྱད་པའི་ནང་ཇའི་བཏུང་བ་འདི་ནི་ཡུ་རོབ་པ་རྣམས་ལ་མུ་མཐུད་ནས་གྲགས་ཆེ་ནའང་ཇའི་གོང་ཚད་འཕར་བ་དང་ཇ་དཀོན་པོར་གྱུར་ཏེ་མཐོ་རིམ་མི་སྣ་ཁོ་ནས་ལོངས་སྤྱོད་པ་ཞིག་ཏུ་གྱུར་པ་རེད།

སྐབས་འདི་ཙམ་ལ་ སི་པཱན་རྒྱལ་ཁབ་དང་། པོར་ཅུ་གྷལ་རྒྱལ་ཁབ་ཀྱིས་ བུ་རམ་ཤིང་དེ་འཛམ་གླིང་ལ་ངོ་སྤྲོད་བྱས་མེད་པ་ཡིན་ན་བཏུང་བ་དེ་ལའང་འགྱུར་བ་ཆེན་པོ་བྱུང་མེད་ཚོད་རེད། རྒྱ་གར་བ་རྣམས་ནི་སྟོན་པ་ཡེ་ཤུའི་དུས་སྐབས་ཙམ་ནས་བུ་རམ་ཤིང་གི་ཁུ་བ་བཙིར་ནས་ཀ་ར་བཟོ་མཁན་དང་པོའི་གྲས་རེད་ལ། བུ་རམ་ཤིང་དེ་དག་ནི་ལྷོ་ཨེ་ཤ་ཡའི་ཁུལ་དུ་ལོ་ངོ་སྟོང་ཕྲག་མང་པོའི་རིང་ལ་ཡོད་པའི་ས་གནས་ཀྱི་སྐྱེ་དངོས་ཤིག་རེད། འོན་ཀྱང་ཡུ་རོབ་པ་རྣམས་ཀྱིས་ཨ་ཧྥི་རི་ཀའི་ཡུལ་ནས་ཡུལ་མི་གཡོག་ཏུ་འཁྱེར་ཏེ་བྱང་ཨ་མི་རི་ཀ་སོགས་སུ་བུ་རམ་ཤིང་འདེབས་པའི་ཞིང་ས་གཞི་རྒྱ་ཆེན་པོ་བཙུགས་པའི་རྗེས་ནས་ཀ་ར་དེ་ཡུ་རོབ་ཁུལ་དུ་ཁྱབ་ཆེ་བ་དང་གོང་ཁེ་པོ་བྱུང་པ་རེད། (བུ་རམ་ཤིང་ ༼Sugarcane༽གི་འཕེལ་རིམ་ལ་བརྟེན་པའི་ཀ་རའི་ལོ་རྒྱུས་ཀྱང་དོ་སྣང་འདྲེན་པ་ཞིག་འདུག)

རྒྱ་གར་ནི་ཟས་རིགས་སྨན་སྣ་སྡེབ་སྦྱོར་བྱེད་མཁན་གྲགས་ཆེན་ཞིག་ཡིན་སྟབས། ས་ཆ་གང་ཞིག་ནས་མི་ཞིག་གིས་ཇའི་ནང་དུ་ཀ་ར་ཁེམ་བུ་གང་ངམ་དོ་འདེབས་པའི་བསམ་བློ་འཁོར་བ་རེད། དེའི་རྗེས་ཞིག་ལ་འོ་མ་ཡང་བསྲེས་ནས་འོ་མ་དང་ཀ་ར་ཅན་གྱི་ཇ་མངར་མོའི་བཏུང་བ་དེ་བྱུང་པ་རེད། ད་དུང་སྒ་སེར་རློན་པ་དང་སྨན་སྣ་གཞན་ཡང་བསྲེས་ནས་ཇ་བསྐོལ་བའི་ལུགས་སྲོལ་དེ་འཕེལ་བར་གྱུར་ཅིང་། དེ་ནས་གློ་བུར་དུ་ རྒྱ་གར་གྱི་ཀ་ར་དང་རྒྱ་ནག་གི་ཇ་བསྲེས་ནས་ཇ་མངར་མོ་ཞེས་པའི་ཡིད་འོང་གི་ལོངས་སྤྱོད་འདི་བྱུང་བ་རེད།

རྒྱ་གར་དུ་ཇ་ཤིང་འདེབས་འཛུགས་ཀྱི་བརྒྱུད་རིམ་སྟོན་པའི་རི་མོ།

རྒྱ་ནག་གི་དུད་ནག་གམ་ཉལ་ཐའི་འཐབ་འཁྲུག་ཅེས་པ་དེ་ལ་ཕལ་ཆེར་ཇའི་དམག་འཁྲུག་ཅེས་ཀྱང་བརྗོད་རུང་བ་ཞིག་རེད། གང་ཡིན་ཟེར་ན། དུས་རབས་བཅོ་བརྒྱད་པའི་ནང་དུ་ཇའི་ཐོན་སྐྱེད་ནི་རྒྱ་ནག་ཁོ་ནའི་ནང་དུ་ཡོད་པ་དང་། དབྱིན་ཇིས་རྒྱ་ནག་ནས་ཉོ་བའི་ཅ་དངོས་ཀྱི་འབོར་ཆེ་ཤོས་དེ་ནི་ཇ་ཡིན་པ་རེད། ཇའི་ཚོང་ཟོག་གི་གྲངས་འབོར་ནི་རྒྱ་ནག་གི་དཀར་ཡོལ་དང་དར་གོས་ལས་ཀྱང་ཆེ་བ་རེད། འོན་ཀྱང་རྙོག་དྲ་ཞིག་ནི་རྒྱ་ནག་གིས་ཇའི་དོད་དུ་དངུལ་རྐྱང་འདོད་པ་དང་། དབྱིན་ཇི་བའི་ལག་པར་དངུལ་ཐོབ་དཀའ་བར་གྱུར།

དེ་ནས་དབྱིན་ཇིས་ཇ་ཚོང་སྐོར་ལ་སྟངས་འཛིན་བྱས་པ་དེར་རང་གི་དབང་འོག་ན་ཡོད་པའི་ཨ་མི་རི་ཀ་སོགས་མ་དགའ་བ་དང་། དེའི་རྐྱེན་ལ་བརྟེན་ནས་ཇའི་དོ་པོ་མང་པོ་རྒྱ་མཚོར་གཡུགས་ཏེ་དབྱིན་ཇིའི་དབང་བསྒྱུར་ནས་ཁ་གྱེས་པའི་ ༡༧༧༣ལོའི་ཨ་མི་རི་ཀ་རུ་ཇའི་ཁྲལ་ལ་ངོ་རྒོལ་བྱེད་པའི་ལས་འགུལ་གྲགས་ཅན་ “Boston Tea Party”ཅེས་པ་དེའང་བྱུང་བ་རེད། སྐབས་འདི་ཙམ་ལ་ཇའི་ཚོང་ཟོག་དཀོན་པོ་དེས་དབྱིན་ཇིའི་དབང་འོག་གི་རྒྱལ་ཁབ་རྣམས་བློ་ཕམ་པ་ཙམ་མ་ཡིན་པར། དབྱིན་ཇིའི་རྒྱལ་ཁབ་རང་ཉིད་ཀྱང་ཇའི་ཚོང་ལ་བརྟེན་ནས་ཉམས་ཉེས་སུ་འགྲོ་ཉེན་ཡོད་པ་རེད།

དེ་ནས་རྒྱ་གར་གྱི་དབྱིན་གཞུང་གིས་རྒྱ་ནག་ལ་མཁོ་བའི་ཚོང་ཟོག་ཅིག་རྙེད་པ་ནི་ཉལ་ཐ་རེད། རྒྱ་གར་དབྱིན་གཞུང་གིས་ཉལ་ཐའི་ཚོང་རྭ་བདག་འཛིན་བྱས་ཏེ་བྷལ་གྷལ་ཁུལ་དུ་ཉལ་ཐ་བཏབ་པ་དང་དེའི་འདེབས་ལས་ཀྱི་ཐབས་བྱུས་གསར་པ་ཚོད་ལྟ་བྱས་པ་རེད། རྒྱ་ནག་གིས་ཉལ་ཐའི་ཚོང་དེ་ཁྲིམས་འགལ་ཡིན་པར་བརྩིས་ནས་བཀག་འགོག་བྱས་སྐབས་རྒྱ་གར་དབྱིན་གཞུང་གིས་ཁྲིམས་དེ་ལ་གཡོལ་ཐབས་བྱས་ཏེ་ནག་ཚོང་བྱེད་པའི་ཐབས་ལམ་བསྟེན་པ་རེད། རྒྱ་ནག་གོང་མས་ཉལ་ཐ་ལ་བརྟེན་ནས་མི་ས་ཡ་མང་པོར་ལང་ཤོར་གྱི་ན་ཚ་ཡོད་སྐོར་བརྗོད་སྐབས་རྒྱ་གར་དབྱིན་གཞུང་གིས་དེ་ལ་ཡ་མེད་བྱས་པ་རེད། དེ་ནས་ ༡༨༣༩ ལོར་རྒྱ་ནག་གོང་མས་ཉལ་ཐའི་སྒམ་ཁྲི་གཉིས་གཞུང་བཞེས་བྱས་སྐབས་དབྱིན་ཇིས་ཐེ་ཚོམ་དང་འགོར་འགྱངས་མེད་པར་དམག་གྲུ་རྒྱ་ནག་ཕྱོགས་ལ་བཏང་ནས་དཀའ་ངལ་སེལ་ཐབས་བྱས་པའི་འབྲས་བུར་རྒྱ་ནག་གི་མཚོ་འགག་རྣམས་སུ་དབྱིན་ཇིའི་ཚོང་སྒོ་འབྱེད་རྒྱུ་དང་ཧོང་ཀོང་རྩིས་ལེན་བྱེད་རྒྱུ་སོགས་ཀྱི་གྲོས་མཐུན་བྱེད་དགོས་བྱུང་བ་རེད།

སྐབས་འདི་ཙམ་ལ་དབྱིན་ཇིའི་རྒྱ་གར་གཞུང་གི་དཔོན་རིགས་སྤྱང་པོ་རྣམས་ཀྱིས་མ་འོངས་པའི་ཇ་ཚོང་ལ་བརྡབ་གསིག་མི་ཡོང་བའི་འཆར་གཞི་བཟོས་པ་དང་། དེ་ཡང་རྒྱ་གར་ནི་ས་ཆ་འོས་ཤོས་དེ་ཡིན་པར་ཐག་གཅོད་བྱས་པ་རེད། མིང་ལ་ Robert Fortune ཟེར་བའི་དབྱིན་ཇི་བ་ཞིག་གིས་ ༡༨༤༨ ལོར་རྒྱ་ནག་ནས་ཇ་ཤིང་རྐུ་ཁྱེར་བྱས་ཤིང་། ཇ་ཤིང་སྤྱད་དེ་སྐབས་འདི་ཙམ་ལ་རྒྱ་གར་གྱི་ཨ་སཱམ་ས་ཁུལ་དུ་ཇ་ཤིང་གི་ཞིང་ལས་མགོ་བརྩམས་པ་རེད། འོན་ཀྱང་ཇའི་ཞིང་ཁ་ལ་ངལ་རྩོལ་པ་དགོས་མཁོ་ཆེ་བ་དང་། དབྱིན་ཇིའི་གོང་མས་ ༡༨༣༣ ལོར་བྲན་གཡོག་བཀོལ་རྒྱུ་རྩ་འགོག་བྱས་བརྟེན། དབྱིན་ཇིའི་རྒྱ་གར་གཞུང་གིས་ལས་མི་རྣམས་ལ་གན་རྒྱའི་ཐོག་ནས་ཇའི་ཞིང་ཁ་རྣམས་ལ་ལས་ཀ་བྱེད་པའི་མགོ་བརྩམས་མོད་དེ་དག་ཀྱང་གཡོག་པོ་དང་ཁྱད་པར་ཆེན་པོ་མེད་པ་རེད། དེ་ནས་ཅང་མ་འགོར་བར་རྒྱ་གར་ནི་ཡུ་རོབ་པ་རྣམས་ལ་ཇའི་ཚོང་ཟོག་ཐོན་སྐྱེད་བྱེད་མཁན་གྱི་ལྟེ་བ་ཞིག་ཆགས་པ་རེད་ལ། རྒྱ་གར་དུ་ཇ་ཤིང་འདེབས་པའི་ཚོང་ལས་ཀྱི་རྐྱེན་བྱས་ཏེ་རྒྱ་གར་བ་ཚོ་ཡང་ཇ་ལ་ལོབས་པར་གྱུར་ཅིང་། དབྱིན་ཇིའི་བྱེད་སྲོལ་ལ་དཔེར་ལེན་གྱིས་རྒྱ་གར་བ་རྣམས་ནི་འོ་མ་དང་ཀ་ར་བསྲེས་པའི་ཇ་མངར་མོ་འཐུང་མཁན་ཞིག་ཏུ་གྱུར་པ་རེད།

ད་ལྟ་དྲ་ཐོག་ནས་ཇའི་ལོ་རྒྱུས་འཚོལ་སྐབས་ཇ་དེ་རྒྱ་ནག་ནས་མཆེད་དེ་འཛམ་གླིང་ལ་ཇི་ལྟར་ཁྱབ་པའི་ལོ་རྒྱུས་རིང་ཐུང་ཅི་རིགས་པ་རྙེད་ཅིང་། བོད་ལ་དུས་རབས་དགུ་པ་ཙམ་ནས་ཇ་དར་པའི་ལོ་རྒྱུས་ཀྱང་ཞོར་ལ་འབྱུང་ངོ་།། གང་ལྟར་ཡུ་རོབ་པ་རྣམས་ཀྱིས་རྒྱ་ནག་དང་ཉི་ཧོང་ལ་ཚོང་འབྲེལ་བྱས་པའི་བརྒྱུད་རིམ་ནང་དུ་ཇའི་བཏུང་བ་འདི་ཉིད་ཡུ་རོབ་ལ་དར་པ་དང་། དབྱིན་ཇིའི་གོང་མའི་སྟོབས་ཤུགས་འཛམ་གླིང་ལ་བཀྱེད་པའི་བརྒྱུད་རིམ་དུ་ཇའི་ཚོང་འབྲེལ་དང་། ཇའི་ཚོང་ཁྲལ་སོགས་ལ་བརྟེན་ནས་ཇ་དེ་འཛམ་གླིང་ལ་ཁྱབ་པར་གྱུར་པའི་ཇའི་ལོ་རྒྱུས་དང་ཚོང་གི་འགྲན་བསྡུར་སོགས་བྱུང་འདུག་གོ།

༡༩༩༠ གོ་གྲངས་ཤིག་ལ་གུས་པ་ཝ་ར་ན་སིར་སྡོད་སྐབས་ཆུ་མོ་གང་གཱའི་འཁྲིས་ན་ཡོད་པའི་དཔེ་སྐྲུན་ཁང་ཞིག་ལ་ཕྱིན་པ་ཡིན། སྐབས་དེར་སྦྱིན་བདག་ཕ་བུ་གཉིས་དང་ལྷན་དུ་བོད་ཡིག་གི་དེབ་ཅིག་པར་སྐྲུན་བྱེད་པའི་སྟ་གོན་བྱེད་ཀྱིན་ཡོད། ཁོང་ཚོས་ཤེལ་ཕོར་ཆུང་ཆུང་ཞིག་གི་ནང་དུ་ངུར་སྨྲིག་གི་མདོག་དང་ལྡན་པའི་བཏུང་བ་ཞིག་འཁྱེར་ཡོང་ཞིང་། དེ་ནི་ཇ་མངར་མོ་རེད། འདི་འདྲའི་ཇ་ཞིམ་པོ་ཞིག་ཡུལ་གཞན་ན་དཀོན་སེ་སྣང་ལ། ལོ་ཤས་གོང་ལ་ཧོང་ཀོང་དུ་བསྐྱོད་སྐབས་ཀྱང་ཧོང་ཀོང་གི་ཟ་ཁང་རྣམས་སུ་ངུར་སྨྲིག་མདོག་གི་ཇ་མངར་མོ་དེ་དག་དར་སྲོལ་ཆེན་པོ་འདུག

དེས་ན་རྒྱ་གར་གྱི་ཇའི་ལོ་རྒྱུས་འདི་ལ་བརྟགས་སྐབས་མར་པ་ལོ་ཙ་བས་མཆོད་རྒྱུ་བྱུང་མེད་པ་རེད་ལ། ཆག་ལོས་ཀྱང་ཇ་མངར་མོ་མཆོད་རྒྱུ་བྱུང་མེད་པ་མ་ཟད། ཁོང་ཚོ་རྒྱ་གར་ན་བཞུགས་སྐབས་ཕ་ཡུལ་གྱི་ཚྭ་ཁུ་ཅན་གྱི་བོད་ཇ་དེ་དྲན་གྱིན་ཡོད་ཚོད་རེད།

ཇའི་གཏམ་རྒྱུད་དུམ་བུ་འདི་ནི་དེ་རིང་རེས་གཟའ་ཉི་མའི་དུས་ཚོད་སྤྱད་དེ་བཏུས་པ་དགེའོ།།