གྲོགས་པོ། ངས་ཁྱོད་ཀྱི་སྙན་ངག་དང་འཕྲིན་ཡིག་ལ་བལྟས་ཟིན། ཁྱོད་ཀྱིས་ང་ལ་དག་བཅོས་དང་དཔྱད་འཇོག་བྱེད་དགོས་པར་སྐུལ་འདུག་པས། དོན་དེ་ནི་ང་ལ་མཚོན་ནས་བཤད་ན་ངོ་གནོང་དགོས་པ་ཞིག་རེད། འདས་པའི་ལོ་ངོ་ཉི་ཤུ་ལྷག་གི་རིང་ལ་ངས་ཉིན་རེར་སྙན་ངག་བཀླགས་མཚམས་བཞག་མ་མྱོང་ལ། མྱུ་གུ་ལག་ཏུ་བཟུང་ནས་སྙན་ངག་གཅིག་ཀྱང་བྲིས་མ་མྱོང་ནའང་། སྙན་ངག་འབྲི་མཁན་ཞིག་གི་དཀའ་སྡུག་དེ་མི་གཞན་དག་གི་བརྩམས་ཆོས་ཁྲོད་ནས་ག་ལེར་རྟོགས་ཡོང་བས། ང་ལ་མཚོན་ན་སྙན་ངག་གི་སྐོར་ནས་ཁ་ཆེན་པོ་གདེང་རྒྱུའི་ཐོབ་ཐང་མི་འདུག་སྙམ། ཁྱད་པར་དུ་ཉིད་ཀྱིས་ང་ལ་སྙན་ངག་དག་བཅོས་བྱེད་པར་སྐུལ་ཡོད་ནའང་། ངས་བལྟས་ན་སྙན་ངག་ནི་མི་གཞན་པའི་ལག་པ་བརྒྱུད་ནས་རང་དགར་བཅོས་ཆོག་པ་ཞིག་གཏན་ནས་མ་ཡིན་པར། འབྲི་མཁན་སྙན་ངག་པ་ཁོ་གཅིག་པུས་གཞི་ནས་རང་གི་དྲན་རེག་མྱོང་གསུམ་དང་ཚིག་གི་གྲུབ་གྲོལ་གཉིས་ཆུ་ལ་ཆུ་བཞག་པ་ལྟར་འཚམ་པོ་ཡོང་ཡོད་མེད་གསལ་བོར་ཤེས་ཐུབ་རྒྱུ་རེད། རྒྱུ་མཚན། སྙན་ངག་འབྲི་མཁན་དང་མི་གཞན་པའི་འཚོ་བའི་མྱོང་གོམས་དང་ལྟ་ལུགས་སོགས་རྦད་དེ་ཁ་ཁ་སོ་སོ་ཡིན་པས། དག་བཅོས་བྱེད་པའི་བློ་སྤོབས་ཞིག་གང་དུའང་ཡོང་མི་ཐུབ་ལ། དག་བཅོས་བྱས་རུང་དེ་ནི་སྙན་ངག་པའི་བསམ་བཀོད་ལས་ལོགས་པའི་འབྲེལ་མེད་དོན་གཞན་ཞིག་ཡིན་པར་ཐེ་ཚོམ་མེད། ཁྱོད་ཀྱིས་ངའི་དཔྱད་འཇོག་ལ་རེ་བཞིན་ཡོད་ནའང་། ངས་བལྟས་ན་སྙན་ངག་པ་རེ་རེ་ནི་དོན་གྱིས་རང་གི་ཞན་སར་ལག་སྙོབ་བྱེད་ཐུབ་པའི་གཟབ་ནན་གྱི་དཔྱད་འཇོག་པ་དེ་ཡིན་པར་འདོད། ལ་ཏིན་གྱི་སྙན་ངག་པ་ཧི་ལ་ཟིས་མི་གཞན་ལ་སྙན་ངག་གྲུབ་རྗེས་ཐད་ཀར་མི་སྤེལ་བར། ཟླ་བ་འགའ་དང་ཡང་ན་ལོ་འགའི་བར་དུ་བསྐྱུར་རྒྱུར་སྐུལ་མ་བཏང་མྱོང་ལ། ངས་བསམ་ན་ཐབས་དེ་ནི་ཁ་ཏ་བསླབ་བྱ་ཡག་པོ་ཞིག་ཏུ་འདོད། སྙན་ངག་བྲིས་ཚར་མ་ཐག་སེམས་རྩ་འཁོལ་ཐོག་ན་ཡོད་སྟབས། བྲིས་མ་ཐག་པའི་སྙན་ངག་དེ་ནི་བརྩམས་ཆོས་ཡག་པོ་ཞིག་ཡིན་སྣང་སྟེར། གལ་ཏེ་ཁྱོད་ལ་རང་ཉིད་ཡར་རྒྱས་འགྲོ་འདོད་ཀྱི་བློ་ཞིག་རྒྱས་ཡོད་ན། དུས་སྐབས་དེར་སེམས་ལྷོད་ལ་ཕབ་ནས་དུས་ཡུན་གང་འཚམ་འགྱངས་རྗེས། ཕྱིར་རང་གི་བརྩམས་ཆོས་ལ་ཞིབ་ལྟ་བྱས་ན། གཞི་ནས་རང་གི་བརྩམས་ཆོས་ཁྲོད་ཀྱི་ཞན་ཆ་མཐོང་ཐུབ་ལ། དུས་སྐབས་དེར་ཐོན་ན་ཁྱོད་ཀྱིས་ཁྱོད་ཀྱི་སྙན་ངག་གེགས་མེད་བཅའ་ཤེས། སྙན་ངག་འབྲི་མཁན་མང་དག་ཅིག་ལ་ཡར་རྒྱས་ཀྱི་སེམས་ཤུགས་མེད་པ་ནི། དོན་གྱིས་རང་སྐྱོན་རང་འདོན་གྱི་སྙིང་སྟོབས་དང་འདུ་ཤེས་ཕོངས་བས་ལན་པ་རེད། ཁྱོད་ཀྱིས་ང་ངོ་མི་ཤེས་ནའང་། ང་ལ་སྙན་ངག་བསྐུར་ནས་ངའི་བསམ་འཆར་ལ་གཟབ་ཉན་བྱེད་འདོད་ཀྱི་ཁེངས་པ་སྐྱུང་བའི་རྣམ་འགྱུར་འདི་ལ། ངས་དྲིན་གཟོའི་ཨ་ལན་ཞིག་འདེབས་རྒྱུ་ཡིན། ངས་གཤམ་ནས་བཤད་རྩིས་ཀྱི་སྐད་ཆ་མང་དག་ཅིག་ནི་དགའ་ཕྱོགས་ཀྱི་བློ་ཚ་བའི་སྟེང་དུ་ཆུ་འཁྱགས་བླུགས་པ་ལྟ་བུར་འགྲོ་ནའང་། ང་ལ་སྣང་དོགས་ཅི་ཡང་ཡོད་མི་སྲིད། རྒྱུ་མཚན་ཁ་ཞེ་གཉིས་ཀྱི་སྐད་ཆ་ནི་ངེས་དོན་གྱི་སྙན་ངག་པ་ཞིག་གིས་དང་ལེན་བྱེད་ཐུབ་པར་ང་ལ་ཡིད་ཆེས་ཡོད། ཁྱོད་ཀྱིས་ངའི་བསམ་འཆར་མང་དག་ཅིག་ལ་ལྟ་སྐབས་རེ་ཞིག་རྣ་ལམ་དུ་འགྲོ་དཀའ་ནའང་། ངས་བཟོད་གསོལ་ཞུས་ནི་ཡིན། ཁྱོད་ཀྱིས་ངའི་ཨ་ལན་ལ་སྒུགས་འདུག་པས། ཁྱོད་ཀྱིས་རེ་བཞིན་པའང་ངོ་དགའ་སྤྲེལ་ལད་ཀྱི་གཅམ་ཚིག་དེ་དག་མིན་པར་མཛོད།

ངས་སྙན་ངག་སློབ་ཁྲིད་ཐེངས་གང་མང་ལ་བྱས་མྱོང་ཁར། རྩོམ་རིག་སྒྱུ་རྩལ་གྱི་དུས་དེབ་དང་ཚགས་ཤོག་གི་རྩོམ་སྒྲིག་པའང་དུས་ཡུན་གང་འཚམ་རིང་བྱས་མྱོང་སྟབས། ང་རང་ན་གཞོན་གྲོགས་པོ་རྣམས་ཀྱི་བརྩམས་ཆོས་ལ་ལྟ་ཀློག་བྱེད་སའི་གླགས་ཅུང་ཡངས་པོ་ཞིག་ལ་འཁེལ། རྩོམ་སྒྲིག་བྱེད་སྐབས་ཀྱི་དུས་ཡུན་ནང་དུ་མཇལ་ཐེངས་མང་ཤོས་ནི་སྙན་ངག་གསར་བ་རེད། ན་གཞོན་རྩོམ་པ་པོ་མང་ཆེ་ཤོས་སྙན་ངག་གསར་བར་འཇུག་འདོད་ཆེ་བ་ལ་རྒྱུ་མཚན་ཕྱོགས་གཉིས་ན་ཡོད་པར་སེམས་ཏེ། གཅིག མི་མང་ཆེ་བས་སྙན་ངག་གསར་བ་འབྲི་རྒྱུ་ནི་ཅུང་སླ་བཅོས་ཀྱི་ལས་ཀ་ཞིག་ལ་བལྟས་འདུག སྙན་ངག་གསར་བར་སྲོལ་རྒྱུན་སྙན་ངག་ནང་བཞིན་སྡེབ་སྦྱོར་གྱི་བཅིངས་རྒྱ་མེད་ལ་རིང་ཐུང་གི་ཚད་བཀག་ཀྱང་མེད་པར། སེམས་ཤུགས་རྒྱས་མ་ཐག བརྩེ་སེམས་ཐོལ་ཐོལ་ཏུ་འཕྱུར་བ་ཚིག་གི་སྲད་བུར་བརྒྱུས་ནས་སྙན་ངག་ཏུ་བཟོས་ཆོག ཡང་མི་ཁ་ཤས་ཤིག་སྲོལ་རྒྱུན་བག་ཆགས་ཀྱི་དབང་དུ་གྱུར་ཏེ། སྙན་ངག་གིས་རྩོམ་རིག་འཕེལ་བའི་རླབས་རྒྱུན་ཁྲོད་དུས་ཡུན་རིང་བོའི་བླ་གནས་ཀྱི་གོ་བབ་བཟུང་ཡོད་སྟབས། རྩོམ་རིག་དོན་དུ་གཉེར་བ་ལ་ཅིས་ཀྱང་སྙན་ངག་འབྲི་དགོས་པའི་བློ་སྔོན་དུ་སོང་འདུག་པར་མ་ཟད། ཞོས་ཀྲི་མའོ་དང་པིན་ཞིན། ལའོ་ཧྲི་སོགས་རྩོམ་པ་པོ་མང་ཆེ་བས་སྙན་ངག་གསར་བ་དོན་དུ་གཉེར་མྱོང་བས། རྩོམ་རིག་གཉེར་བ་ལ་ཅིས་ཀྱང་སྙན་ངག་སྲོག་ཏུ་བཟུང་ནས་གཉེར་དགོས་པར་འདོད་ཀྱིན་འདུག དོན་གྱིས་སྙན་ངག་རྩོམ་རྒྱུ་སླ་མོ་ཡིན་མིན་ཐད་ང་ལ་དངོས་བརྒྱུད་ཀྱི་མྱོང་སྣང་མི་ཟབ་ནའང་། ངས་ཀྲུང་གོ་དང་ཕྱི་རྒྱལ་གྱི་སྙན་ངག་སྨྲ་བ་ཆེན་མོ་དག་གི་བརྩམས་ཆོས་ལ་བསམ་ཞིབ་བྱས་པ་གཞིར་བཟུང་ནས་བཤད་ན། སྙན་ངག་ནི་ཆེས་མཛེས་མཚར་གྱི་མཐོང་སྣང་དེ་ཆེས་གསར་ཤོས་ཆེ་ལ་གྲིམ་ལྷོད་རན་པའི་སྐད་ཆའི་ཁྲོད་ནས་མངོན་མཚོན་བྱེད་དགོས་པས། མཛེས་མཚར་གྱི་མྱོང་ལུགས་དང་གསར་ཤོས་ཆེ་ལ་ཆ་འགྲིག་པའི་སྐད་ཆ་གཉིས་རང་དགར་སླ་མོ་བྱས་ནས་ཐོབ་ཐུབ་པ་ཞིག་མིན་པར་སྙམ། ངག་རིག་སྨྲ་བ་ལ་དབང་འབྱོར་བའི་ངེས་དོན་གྱི་སྙན་ངག་པ་དག་གིས་ཀྱང་མི་ཚེ་གང་བོའི་དཀའ་ལས་མང་པོ་བརྒྱུད་མཐར་ཐོབ་ཀྱིན་ཡོད། དེང་སྐབས་སྙན་ངག་པ་བཅའ་མཁན་མང་ལ་སྙན་ངག་ཤེས་མཁན་ཉུང་གི སྙན་ངག་ནི་སླ་བཅོས་ཀྱི་དོན་ཞིག་གོ་སྙམ་ནས་འཁྲུལ་ཤེས་བཟུང་ནས་བསྡད་ན། སྙན་ངག་ངོ་མ་དང་རྒྱང་ཁད་ཀྱིས་ཆོད་འགྲོ འདུ་ཤེས་དེའི་ངོས་ནས་སྙན་ངག་ཅི་ཙམ་བྲིས་རུང་། མི་ཚེ་གང་བོར་རང་རྒྱུས་མེད་པ་ཞིག་ལས་ཅི་ཡང་མི་འཇོན། རྩོམ་རིག་སློབ་པར་སྙན་ངག་ལ་ཅིས་ཀྱང་འཇུག་པའི་དགོས་གལ་ཆེའམ། ངས་བསམ་ན་དེའང་གནད་དོན་ཞིག་རེད་འདོད། རྩོམ་རིག་གིས་སྒྱུ་རྩལ་གྱི་བླ་གནས་ལ་རེག་དགོས་ན། ཏོག་དང་རྒྱལ་མཚན་ལྟ་བུའི་སྙན་ངག་ལ་འཇུག་དགོས་པར་ང་རང་ངོས་ནས་ཡིད་ཆེས་ཡོད་པར་མ་ཟད། ཇི་སྲིད་མིའི་ཚེ་སྲོག་མ་འཇིག་གི་བར་དུ་དེ་སྲིད་སྙན་ངག་འཇིག་མི་སྲིད་པ་ལའང་ཡིད་ཆེས་ཆེན་པོ་ཡོད། འོན་ཏེ་དུས་རབས་རེ་རེའི་རྩོམ་རིག་ལ་དུས་རབས་སོ་སོའི་བབ་དང་འཚམ་པའི་མངོན་མཚོན་བྱེད་སྟངས་རེ་ཡོད་པ་ལའང་ང་རང་ཡིད་ཆེས་ཡོད། དཔེར་ན། ཧི་མ་དེང་གི་དུས་སུ་སྐྱེས་པ་ཡིན་པའི་ཆ་འཇོག་བྱས་ན། ཁོས་ལོ་རྒྱུས་སྙན་རྩོམ་འབྲི་མི་སྲིད་ནའང་ཐང་། ཐོ་ཟི་ཐོ་ཡུས་ཧྥུའུ་ཟི་ཅི་ལགས་གནའ་བོའི་དུས་སུ་བྱོན་པའི་དབང་དུ་བཏང་ན། ཁོང་གིས་བརྩམས་སྒྲུང་འབྲི་མི་སྲིད་ནའང་ཐང་། དེ་བས། ང་ཚོའི་དུས་རབས་འདིར་མཚོན་ནས་བཤད་ན། རྩོམ་རིག་གི་ཡོངས་ཁྱབ་མངོན་མཚོན་བྱེད་ཐབས་ནི་ལྷུག་རྩོམ་དང་བརྩམས་སྒྲུང་ཡིན་པ་ལས་སྙན་ངག་མིན་པར་སེམས་ལ། སྣང་ཚུལ་འདི་ནི་ང་མི་སྒེར་གྱི་བློ་ལྟར་སྣང་སྔོན་དུ་སོང་ནས་མཐའ་སྡོམ་བཀོད་པ་ཙམ་མ་ཡིན་པར། ནུབ་གླིང་གི་དཔྱད་བརྗོད་པ་རྣམས་ཀྱིས་ཀྱང་དེ་མཐུན་གྱི་བསམ་ཚུལ་བཏོན་ཡོད། གཞོན་རབས་མང་དག་ཅིག་གིས་ཆེས་དཀོན་པའི་སྟོབས་ཤུགས་མང་དག་ཅིག་སྙན་ངག་གསར་བ་རྩོམ་པའི་ཐད་བཏང་ནས། བྱིས་བློ་ཅན་གྱི་ཚོར་སྣང་ཅི་རིགས་ཕྱིར་བཏོན་ཚར་བ་དང་མཉམ་དུ། ཁོ་ཚོའི་ཤེས་རིག་ཡོན་ཏན་ཀྱང་དེ་བསྟུན་རྫོགས་ཚར་གྱིན་འདུག ངས་བསམ་ན་རིན་མེད་ཀྱི་འཛད་སྟངས་འདི་ནི་ཕངས་སེམས་སྐྱེ་དགོས་པ་ཞིག་རེད་འདོད། གལ་ཏེ་ཁོ་ཚོས་ནན་ནན་ཏིག་ཏིག་གིས་ལྷུག་རྩོམ་དང་བརྩམས་སྒྲུང་འབྲི་སྦྱོང་བྱས་ཡོད་ཚེ། དེ་བསྟུན་གྱི་གྲུབ་འབྲས་གང་ལ་གང་འཚམ་ཞིག་ལོན་ཡོད་ཀྱང་སྲིད། ཆ་འཇོག་འདིས་ན་གཞོན་ཚང་མ་སྙན་ངག་མི་འབྲི་བར་སྐུལ་སློང་བྱས་པ་གཏན་ནས་མིན། སྙན་ངག་ནི་སྔར་བཞིན་རྩོམ་དགོས་པ་སྨྲོས་མེད་ཡིན་ནའང་། སྙན་ངག་འབྲི་མཁན་ཡིན་ན་རང་གི་དངོས་བརྒྱུད་ཀྱི་མྱོང་སྣང་རྣལ་མ་སྙན་ངག་མ་ཡིན་པའི་སྒོ་ནས་མངོན་མཚོན་བྱེད་མི་རུང་བར་ཡིད་གདེང་འཁེལ་རྒྱུ་ནི་གལ་ཆེན་རེད་འདོད། གལ་ཏེ་སྙན་ངག་གི་རྣམ་པས་མངོན་མཚོན་བྱས་པ་ལྷུག་རྩོམ་གྱིས་ཀྱང་སྟོན་ཐུབ་པར་མ་ཟད། ད་དུང་ལྷུག་རྩོམ་གྱིས་བསྟན་པ་སྙན་ངག་གི་སྟོན་ཚད་ལས་འགོངས་ཡོད་དུས །གཞི་ནས་ང་ཚོའི་འཚོ་བའི་ནང་དུ་ད་དུང་སྙན་ངག་མུར་འཚོ་ཞིང་གནས་དགོས་ངེས་ཀྱི་རྒྱུ་མཚན་ཤོར་སོང་བ་མ་ཡིན་ནམ། ངས་སྙན་ངག་གསར་བ་མང་དག་ཅིག་བཀླགས་པ་ལ་གཞིགས་ན། དེང་གི་སྙན་ངག་གསར་བ་མང་དག་ཅིག་རྩོམ་རིག་གི་ཁྲོད་གནས་དགོས་ངེས་ཀྱི་གནས་ལུགས་ཅི་ཡང་མེད་པའི་སེམས་ཚེགས་དེ་ང་ལ་ལན་གཅིག་མིན་པར་བྱིན་སོང་།

སྙན་ངག་གནས་དགོས་པའི་རྒྱུ་མཚན་ནི་དོན་གྱིས་རྩོམ་རིག་སྒྱུ་རྩལ་གྱི་ནང་དོན་དང་རྣམ་པ་གཉིས་ཀ་དགར་དུ་མི་རུང་བའི་ཆ་ན་ཡོད། སྙན་ངག་རེ་རེ་ནི་སྒྱུ་རྩལ་ཐོན་རྫས་རེ་དང་འདྲ་བར། ཤ་ཁྲག་གདོས་བཅས་ཚང་བའི་རྣམ་ཤེས་ཡིན། ཤ་ཁྲག་རྣམ་ཤེས་ལ་བརྟེན་པ་ན་གཞི་ནས་གྲུང་ཤ་དོད་པོ་ཅན་དུ་གྱུར་བ་ཡིན་ལ། རྣམ་ཤེས་ཀྱང་ཤ་ཁྲག་ལ་བརྟེན་པས་དེའི་བྱེ་བྲག་གི་ཆ་ལ་ཚོད་བགམ་བྱེད་ཐུབ་པ་བྱུང་། སྙན་ངག་གི་རྣམ་པ་ནི་ཤ་ཁྲག་དང་ནང་དོན་ནི་རྣམ་ཤེས་ལ་ཆ་འཇོག་བྱས་ཚེ། སྙན་ངག་གི་ཤ་ཁྲག་གདོས་བཅས་ཀྱི་ཕུང་བོ་དེར་རྣམ་ཤེས་དམིགས་བསལ་བ་ཞིག་ཞུགས་ཡོད་དམ། གནད་དོན་དེ་ནི་ཁོའི་ཕྱི་ངོས་ནས་མཐོང་བ་ནང་བཞིན་གྱི་སླ་མོ་ཞིག་མ་རེད། འོལ་སྦྱི་ཙམ་གྱི་གནས་སྟངས་ངོས་ནས་བཤད་ན། རྣམ་པ་འདྲ་མཚུངས་ཡིན་པའི་སྙན་ངག་ལའང་ནང་དོན་མི་འདྲ་ཁྲི་འབུམ་ཡོད། གནའ་ནས་ད་ལྟ་ལ་ཐུག་གི་བར་དུ། སྙན་ངག་པ་ག་ཚོད་ཅིག་གིས་སྙན་ངག་བདུན་ཚིག་རྐང་བརྒྱད་མ་དང་སྙན་ངག་ཚིག་ཕྲེང་བཅུ་བཞི་མ་སོགས་སྲོལ་རྒྱུན་གྱི་འབྲི་ཐབས་ཐེངས་ག་ཙམ་ལ་སྤྱད་མྱོང་ཡོད་དམ། རྩོམ་ལུགས་ཆ་འདྲ་བ་ལས་མངོན་པའི་ནང་དོན་རྦད་དེ་ཁ་ཁ་སོ་སོ་ཡིན་པར་མ་ཟད། སྙན་ངག་པ་གཅིག་གི་བརྩམས་ཆོས་རེ་རེའང་སྒེར་གཤིས་ཀྱིས་ཁྱོགས་ཡོད། ནང་གནས་སྐད་ཆའི་དབྱངས་འགྲོས་ཀྱི་ཆ་ནས་བཤད་ན། རྩོམ་སྟངས་གཅིག་པ་ལྟར་བརྩམས་པའི་སྙན་ངག་མང་པོ་གྱེར་བ་ལས་བྱུང་བའི་སྒྲ་གདངས་ནི། སྐད་ཆའི་ཉམས་འགྱུར་ཞུགས་ཚད་དང་བསྟུན་ནས་འགྱུར་ལྡོག་སྣ་མང་བྱུང་མཐར་སྙན་ངག་གི་ཐུན་མོང་མ་ཡིན་པའི་རོལ་དབྱངས་ཀྱི་རང་གཤིས་ཀྱི་ངོ་བོར་འཕོས་ཀྱིན་ཡིན། རྣམ་པ་དང་ནང་དོན་གཉིས་ལ་འབྲེལ་བ་ངེས་ཅན་ཡོད་ནའང་། སྙན་ངག་ལ་འཇུག་མཁན་མང་དག་ཅིག་གིས་སྙན་ངག་བདུན་ཚིག་རྐང་བརྒྱད་མ་དང་སྙན་ངག་ཚིག་ཕྲེང་བཅུ་བཞི་མ་སོགས་ཀྱི་ཕྱིའི་སྟོང་གཟུགས་ཁོ་ན་སྙན་ངག་གི་རྣམ་པར་བལྟས་འདུག་པ་ནི་ནོར་འཁྲུལ་ཞིག་རེད། སྙན་ངག་རེ་རེར་རང་བབ་ཀྱི་ཁྱད་གཤིས་དང་ལྡན་པའི་རྣམ་པ་རེ་ཡོད་ཅིང་། རྣམ་པའི་སྟེང་གི་ཁྱད་ཆོས་དེས་སྙན་ངག་གི་སྒེར་གཤིས་བསྐྲུན། སྒེར་གཤིས་དེ་ནི་བརྩེ་བ་དམིགས་བསལ་བ་ཞིག་ལས་མངོན་པའི་སྐད་ཆའི་དབྱངས་འགྱུར་ཡིན། སྙན་ངག་ལ་སྒེར་གཤིས་དང་སྤྱི་གཤིས་ཀྱི་རྣམ་པ་གཉིས་ཀ་ཡོད་ཅིང་། ཆེས་གལ་ཆེ་བ་ནི་སྒེར་གཤིས་ཀྱི་རྣམ་པ་དེ་རེད། སྙན་ངག་གིས་བརྩེ་བ་དབྱངས་སུ་གྱེར་བ་ལ་ཡི་གེ་ཁོ་ནས་མི་འགྲུབ་པར་ཅིས་ཀྱང་སྐད་ཆའི་དབྱངས་འགྱུར་ལ་ཤུགས་སྣོན་རྒྱག་དགོས། སྙན་ངག་གིས་སྐད་ཆའི་རོལ་དབྱངས་ཀྱི་རང་བཞིན་འདོན་སྤེལ་གང་ལེགས་བྱས་ཏེ། ཡི་གེའི་དོན་སྟོན་ཚད་མི་འདང་སར་ཁ་གསབ་བྱེད་དགོས། སྲོལ་རྒྱུན་སྙན་ངག་གི་ངེས་གཏན་སྒྲོམ་གཞིའི་རྣམ་པ་དེ་ནི་རོལ་དབྱངས་ཀྱི་རང་བཞིན་འདོན་སྤེལ་བྱེད་ཐབས་ཀྱི་ལག་ཆ་ཞིག་རེད། སྙན་ངག་དང་ལྷུག་རྩོམ་གཉིས་བསྡུར་ན། ལྷུག་རྩོམ་ལ་རྣམ་པ་འདི་ཞེས་སྟོན་རྒྱུ་ཞིག་མེད་མོད། སྙན་ངག་ལ་བརྟན་འཇགས་ཀྱི་རྣམ་པ་ཞིག་ཡོད། སྙན་ངག་གིས་ངེས་གཏན་སྒྲོམ་གཞིའི་རྣམ་པའི་ཁྲོད་ནས་འགྱུར་ལྡོག་སྣ་མང་ལ་བརྩོན་ལེན་དང་བཅིངས་རྒྱའི་ཁྲོད་ནས་རང་དབང་ལ་བརྩོན་ལེན་བྱས་ཏེ། རྣམ་པའི་འགྱུར་བ་རྫོགས་མཐའ་མེད་པ་ཞིག་བསྐྱེད། སྙན་ངག་གི་རོལ་དབྱངས་རང་བཞིན་ནི་ལྷུག་རྩོམ་ལས་སྣ་མང་རྙོག་འཛིང་གི་ཁྱད་ཆོས་ལྡན། དེ་ནི་རོལ་དབྱངས་ལ་རང་བྱུང་ཁམས་ཀྱི་སྒྲ་མང་དག་ཅིག་ལས་སྣ་མང་རྙོག་འཛིང་གི་ཤས་ལྡན་པ་དང་འདྲ། སྙན་ངག་པས་རྣམ་པར་བརྟེན་ནས་ནང་སེམས་ཀྱི་ཚོར་བའི་གདངས་དབྱངས་གྱེར་བ་ནི། དོན་གྱིས་རོལ་མོ་བ་ཞིག་གིས་རོལ་ཆས་ལག་ཏུ་བཟུང་ནས་དབྱངས་ཚིགས་བརྒྱད་པོ་བསྲེས་ནས་སྙན་འགྱུར་འབུམ་ལྡན་གྱི་དབྱངས་རྟ་ཞིག་རྩོམ་པ་དང་ཆ་འདྲ།

སྙན་ངག་གསར་བ་རྩོམ་དཀའ་བའི་རྒྱུ་མཚོན་ནི་སྲོལ་རྒྱུན་སྙན་ངག་ལ་སྙན་ངག་བདུན་ཚིག་རྐང་བརྒྱད་མ་དང་སྙན་ངག་ཚིག་ཕྲེང་བཅུ་བཞི་མ་སོགས་ཀྱིས་མཚོན་པའི་བརྟན་ཆགས་ཀྱི་སྒྲོམ་གཞི་གསལ་བོ་ཞིག་ཡོད་ཅིང་། སྲོལ་རྒྱུན་སྙན་ངག་ལེགས་པོ་ཞིག་ལ་ཁོ་དང་འཚམ་པོ་ཡིན་པའི་སྒེར་གཤིས་ཤིག་གྲུབ་མེད་པའི་དབང་དུ་བཏང་རུང་། དེར་སྲོལ་རྒྱུན་སྙན་ངག་ཀུན་ལ་རང་ཆས་སུ་མངའ་བའི་ཐུན་མོང་གི་སྒྲོམ་གཞི་དེ་ཡོད་ངེས་གཏན་ཡིན། རོལ་དབྱངས་ཀྱི་སྒྲོམ་གཞི་གསལ་བའི་སྙན་ངག་ཅིག་ཡིན་ཕྱིན། སྨྲ་སྒོར་བླངས་མ་ཐག་ཁ་ལ་ངང་གིས་ལྷུང་འགྲོ་བར་ཐེ་ཚོམ་མེད། སྙན་ངག་གསར་བ་ལ་བརྟན་ཆགས་ཀྱི་སྒྲོམ་གཞི་གསལ་ཐག་ཅིག་ད་དུང་གྲུབ་མེད་པར་མ་ཟད། སྙན་ངག་གསར་བར་འཇུག་མཁན་མི་ཉུང་བ་ཞིག་ལ་ཐབས་རྩལ་སྟེང་གི་སྦྱོང་བརྡར་སྔོན་དུ་སོང་མེད་སྟབས། སྙན་ངག་རེ་རེའི་སྟེང་ནས་མངོན་པར་གསལ་ཞིང་སྒེར་གཤིས་ཀྱིས་ཁྱོགས་པའི་སྒྲ་ཚིགས་ཀྱི་དབྱངས་རྟ་འཛིན་མ་ཐུབ་པས། གཞི་ནས་སྙན་ངག་གི་སྒྲིག་གཞི་འཐོར་གྱར་ཡ་གྱལ་ཞིག་བསྐྲུན་པ་ལས། སྙན་ངག་གི་རྣམ་པའི་མིང་ཙམ་ཡང་གླེང་ཐབས་མེད་པ་ཞིག་ཏུ་གྱུར་བ་རེད། རྣམ་པ་ནི་སྒྲོམ་གཞི་གསལ་ཐག་ཅིག་གི་སྟེང་དུ་སྒེར་གཤིས་བསྣན་པར་ཆ་འཇོག་བྱས་ན། སྙན་ངག་གི་རྣམ་པ་ནི་སྙན་ངག་དེའི་རྣམ་ཤེས་སུ་བསྙད་ཆོག སྙན་ངག་གསར་འཇུག་པ་ཚོའི་ཕམ་ཁ་ཆེ་ཤོས་ནི་རྣམ་པ་གསར་ཤ་དོད་པོ་ཞིག་བཏོད་མི་ཐུབ་པ་དེ་ཡིན་ལ། ཡང་བཤད་ཕྱོགས་གཞན་ཞིག་གི་ངོས་ནས་བཤད་ན། འབྲི་མཁན་གྱིས་རང་གི་སྟོན་འདོད་ཚོར་སྣང་དེ་ལ་རང་གི་ཁ་སྟབས་དང་འཚམ་པོ་ཡིན་པའི་སྐད་ཆའི་དབྱངས་འགྲོས་ཤིག་སྦྱོར་ཐུབ་ཀྱིན་མེད་པ་དེ་རེད་འདོད།

ཁྱོད་ཀྱི་སྙན་ངག་ལེགས་འགྲུབ་བྱུང་མི་འདུག ཁ་ཁོག་མེད་པར་བཤད་ན། ཁྱོད་ཀྱང་སྙན་ངག་གསར་འཇུག་པ་ཚོ་དང་འདྲ་བར། སྙན་ངག་གི་རྣམ་པ་གསར་རྐྱང་ཞིག་རྩོམ་ཐུབ་མེད་པས། ང་ཚོ་ཀློག་པ་པོས་ཡི་གེའི་བསྟན་དོན་གྱི་ཕར་ངོགས་ནས་ཡིད་ཀྱི་དང་བ་ངང་གིས་འདྲེན་བྱེད་ཀྱི་རྐྱེན་གཞན་པ་ཅི་ཡང་མཐོང་མ་བྱུང་། ཁྱོད་ཀྱིས་རང་གི་བྲིས་བྲིས་ཐམས་ཅད་པོ་སྙན་ངག་གསར་བ་ཡིན་འདང་གིས་རྩོམ་གྱིན་འདུག་ནའང་། དོན་ལ་དེ་དག་ཐམས་ཅད་ནི་ལྷུག་རྩོམ་ལས་མ་འདས། ལྷུག་རྩོམ་ཞིག་གི་ཚད་གཞིའི་ངོས་ནས་བལྟས་པ་ཡིན་ན་དེ་འབྲེལ་གྱི་ལྷུག་རྩོམ་ཡག་པོ་ཞིག་ཀྱང་འཁྱོངས་མི་འདུག ཁྱོད་ཀྱིས་ཐིག་ཕྲེང་གོང་འོག་གི་བར་ཆོད་པར་བྱས་ཏེ་བརྩམས་ཡོད་མོད། གལ་སྲིད་ལྷུག་རྩོམ་ནང་བཞིན་ཚིག་དང་ཚིག་གི་བར་མ་བཅད་པར་བརྗོད་འདོད་ཀྱི་དོན་མཐའ་ལ་ཐུག་གི་བར་དུ་བཀྲམ་ཚེ། ཁྱོད་ལ་རང་གི་སྟོན་འདོད་པ་མང་དག་ཅིག་ག་ཤེད་ཅིག་ནས་ཤོར་དོགས་ཀྱི་ཕངས་སེམས་དེ་ཡོད་དམ། ང་རང་དབྱིན་ཡིག་གི་ལམ་ནས་བྲིས་པའི་སྙན་ངག་གསར་བ་ཀློག་པར་ཧ་ཅང་མོས། ང་ལ་དབྱིན་ཡིག་སྙན་ངག་ལེགས་མིན་ལ་དབྱེ་དབྱེད་བྱེད་པའི་ཚད་གཞི་མཚར་བོ་ཞིག་ཡོད་དེ། སྙན་ངག་ཅིག་མིག་ལམ་དུ་བསྟར་མ་ཐག ཐོག་མར་སྙན་ངག་དེའི་བསྟན་དོན་གོ་མིན་ལ་ཁ་ཡ་ཁྱོན་ནས་མ་བྱས་པར། མགོ་ནས་མཇུག་བར་ཐེངས་གཅིག་གྱེར་ནས། བཀླགས་པའི་གོ་རིམ་ཁྲོད་དེར་གཞན་དང་མི་མཚུངས་པའི་སྐད་ཆའི་དབྱངས་འགྲོས་རང་ཡན་པ་ཞིག་ཡོད་མེད་ལ་བལྟས་པ་ཡིན། གལ་ཏེ་དབྱངས་ཀྱི་འདེགས་འཇོག་གསལ་ལ་གྲིམ་ཤ་དོད་པོ་ཞིག་ཡིན་དུས། སྙན་ངག་དེའི་ཚིག་ངོས་ཀྱི་ལྟག་རྒྱབ་ན་ལྟ་རིན་ཅན་གྱི་དངོས་པོ་གསར་རྐྱང་ཞིག་ཡོད་པར་ཐག་གཅོད་བྱས་པ་ཡིན། གལ་ཏེ་སྐད་ཆའི་དབྱངས་འགྲོས་འཆོལ་ནས་ཉག་ཉོག་ཟང་ཟིང་དུ་གྱུར་ཡོད་ཚེ། སྙན་ངག་རྩོམ་མཁན་དེའི་བསམ་བཀོད་ཀྱང་དེ་བསྟུན་ཉབ་ཉོབ་གསོབ་གཟུགས་ཡིན་པ་ཚིག་ཐག་བཅད་ནི་ཡིན།
མུ་འགོད།

གསལ་བཤད། དེ་རིང་ནས་བཟུང་ཁོམ་སྐབས་དང་བསྟུན་ནས་རྒྱའི་མཁས་པ་ཆེན་མོ་སྐུ་ཞབས་ཀྲུའུ་ཀོང་ཆན༼朱光潜༽གྱིས་བརྩམས་པའི《སྙན་ངག་གི་རྣམ་བཤད།》༼《诗论》༽ལས་སྙན་ངག་གསར་བ་འབྲི་མཁན་ན་གཞོན་ཞིག་ལ་སྤྲིངས་པའི་འཕྲིན་ཞེས་པ་འདི་བསྒྱུར་ནས། རང་གི་སྐད་འཕྲིན་བར་སྟོང་ཁྲོད་དུམ་ཚན་རེ་རེ་བྱས་ཏེ་མུ་འགོད་བྱ་རྒྱུ་ཡིན།

8

མུ་འགོད།