9780674427730-therigatha-3-4-viewཉིན་ཤས་སྔོན་ཕྲན་གྱིས་ “ཇོ་མོའི་གླུ ནང་པའི་བུད་མེད་ཐོག་མ་བ་རྣམས་ཀྱི་སྙན་ངག་” (Therigatha: Poems of the First Buddhist Women)ཅེས་པའི་ཚིག་འདི་གསར་འགྱུར་འདི་ནས་མཐོང་བར་གྱུར།  གསར་འགྱུར་དེར་ཇོ་མོའི་གླུ་འདི་དག་ནི་ནང་པའི་དགེ་སློང་མ་ཆེས་ཐོག་མ་བ་དག་གིས་མི་ལོ་ཉིས་སྟོང་སྔ་རོལ་དུ་པཱ་ལིའི་སྐད་དུ་བརྩམས་པའི་བུད་མེད་ཀྱི་སྙན་ངག་ཅིག་ཡིན་པར་བཤད་པ་མ་ཟད། སྙན་ངག་འདི་ནི་འཛམ་གླིང་སྟེང་གི་བུད་མེད་ཀྱི་སྙན་ངག་དང་བུད་མེད་ཀྱི་བརྩམས་ཆོས་ཆེས་སྔ་ཤོས་ཡིན་པ་དང་། གནའ་བོའི་རྒྱ་གར་གྱི་འཚོ་བའི་ཁྲོད་ཀྱི་བུད་མེད་ཀྱི་ཉམས་མྱོང་སྟོན་པ་དང་སྒེར་གྱི་ཚོར་བ་སྟོན་པའི་ཐད་ནས་འགྲན་ཟླ་མེད་པ་ཞིག་ཡིན་པར་བཤད།

གསར་འགྱུར་ནི་ སྙན་ངག་གི་དེབ་འདི་སྐད་གཉིས་ཤན་སྦྱར་གྱིས་ཉེ་ཆར་པར་དུ་བཏབ་པའི་གནས་ཚུལ་དེ་རེད། དེ་ཡང་རྒྱ་གར་བ་རོ་ཧཱན་ མུར་ཏེ་(Rohan Murty) ནི་ལོ་སུམ་ཅུ་སོ་གཉིས་ཡིན་པ་དང་། ཁོང་ནི་རྒྱ་གར་གྱི་མཉེན་ཆས་གྲགས་ཅན་ Infosys ཞེས་པ་འཛུགས་མཁན་ N R Narayana Murthyཞེས་པའི་བུ་ཡིན་པ་དང་། ཁོང་གིས་ཨ་རིའི་ཧར་ཝར་ཌི་སློབ་གྲྭ་ཆེན་མོར་གློག་ཀླད་ཚན་རིག་ཐད་འབུམ་རམས་པ་འདོན་པའི་སྐབས་སུ་ཁོང་གིས་རྒྱ་གར་གྱི་གནའ་རྩོམ་གྲགས་ཅན་སྐོར་ལ་ཅུང་ཟད་ཙམ་མ་གཏོགས་མི་ཤེས་པ་ལ་བརྟེན་ནས་མི་ལོ་ ཉིས་སྟོང་གི་ཡུན་ལ་རྒྱ་གར་བ་རྣམས་གནས་སྡོད་ཇི་ལྟར་བྱས་པའི་སྐོར་ཤེས་འདོད་ཀྱིས་གནའ་བོའི་རྒྱ་གར་གྱི་ཚད་མ་དང་གྲུབ་མཐའི་སྐོར་གྱི་འཛིན་གྲྭ་ཞིག་བླངས་པ་རེད། ཁོང་གིས་བཤད་དོན། “ངས་དུས་རབས་ལྔ་པའི་ནང་གི་དཔེ་ཆ་ཞིག་ཀློག་མགོ་བཙུགས་རྗེས་རྒྱ་གར་གནའ་བོའི་ཤེས་རིག་ཕྱུག་པོ་དེ་ལ་ང་ཡ་མཚན་སྐྱེས་བྱུང་ལ། མཚམས་རེར་འདི་དག་ནི་ནུབ་ཕྱོགས་ལྟ་གྲུབ་ལས་ཀྱང་ཚད་མཐོ་བ་རེད་འདུག་”ཅེས་བརྗོད་འདུག དེ་ལྟ་བུའི་གནས་ཚུལ་བརྒྱུད་ནས་ཁོང་གིས་རྒྱ་གར་གྱི་གནའ་བོའི་རིག་གནས་བརྒྱུད་སྤེལ་ཇི་ལྟར་བྱེད་པའི་སྐོར་ལ་བསམ་གཞིགས་བྱས་ཤིང་། ཁོ་ལུམ་བྷི་ཡའི་ལྷོ་ཨེ་ཤ་ཡའི་སྡེ་ཁག་གི་དགེ་རྒན་ཆེན་མོ་ཤེལ་ཌོན་ པོ་ལོག་(Sheldon Pollock)ཞུ་བ་དང་མཇལ་ཏེ་ ཨ་སྒོར་ས་ཡ་ལྔ་ལྷག་ཙམ་གྱི་མ་རྩ་བཙུགས་ནས་རྒྱ་གར་གྱི་གནའ་རྩོམ་དཔེ་མཛོད་ཁང་ཞིག་སྟེ་མིང་ལ་Murty Classical Library of India ཞེས་པ་བཙུགས་པ་དང་། ཚོགས་པ་དེས་ལོ་རེར་གནའ་རྩོམ་པོད་ལྔ་རེ་ཇི་སྲིད་འཚོའི་བར་དུ་དཔེ་སྐྲུན་བྱེད་རྒྱུའི་འཆར་གཞི་བཀོད་ཡོད་འདུག འཆར་གཞི་དེའི་ཁོངས་ནས་ཐོག་མའི་པོད་ལྔ་དཔར་སྐྲུན་བྱས་པའི་ཁོངས་སུ་གོང་གསལ་དགེ་སློང་མའི་སྙན་ངག་དེ་དཔར་སྐྲུན་བྱས་ཡོད་འདུག ཁོང་ཚོའི་དྲ་བ་ཞིག་ཡོད་པ་དེའི་ཁ་བྱང་ནི་ http://www.murtylibrary.com འདི་ཡིན་པ་དང་། དེར་ངོ་སྤྲོད་བྱས་པ་ལྟར་ན་དཔེ་མཛོད་ཁང་འདི་ལ་ཚོགས་པ་འཛུགས་མཁན་རོ་ཧཱན་ མུར་ཏེ་དང་། དེ་བཞིན་རྩོམ་སྒྲིག་པ་དགེ་རྒན་ཆེན་མོ་ཤེལ་ཌོན་ པོ་ལོག དེ་བཞིན་རྩོམ་སྒྲིག་ཚོགས་མི་གཞན་བཞི་བཅས་ཡོད་འདུག

ལོ་འདིའི་པར་མ་ “ཇོ་མོའི་གླུ ནང་པའི་བུད་མེད་ཐོག་མ་བ་རྣམས་ཀྱི་སྙན་ངག་” (Therigatha: Poems of the First Buddhist Women) ཞེས་པ་འདི་ནི་ སྐུ་ཞབས་ Charles Halliseyཞེས་པས་བསྒྱུར་ཅིང་། གོང་གསལ་དཔེ་མཛོད་ཁང་གིས་ ༢༠༡༥ ལོའི་ཟླ་བ་དང་པོའི་ནང་པར་སྐྲུན་བྱས་པ་ཞིག་རེད།

81OdYOM6uQLདེ་ནས་དྲ་རྒྱ་ཁག་ནས་གོང་གསལ་སྙན་ངག་གི་བསྟན་བཅོས་དེ་བཙལ་བ་ཡིན། ཨིན་ཡིག་ཏུ་འདིའི་སྐོར་གྱི་དེབ་མང་ཙམ་ཐོན་ཡོད་པར་སྣང་། ལྕམ་ Caroline Augusta Foley Rhys Davids (1857-1942) ཞེས་པས་ “སྲིང་མོ་རྣམས་ཀྱི་མཆོད་གླུ་” (PSALMS OF THE SISTERS)ཞེས་པའི་མཚན་བྱང་ཐོག་ནས་སྙན་ཚོམས་འདི་ཉིད་ཨིན་འགྱུར་དང་དེའི་མཆན་འགྲེལ་བཅས་བརྩམས་པ་ ༡༩༠༩ ལོར་ལོན་ཌོན་དུ་པར་སྐྲུན་བྱས་པ་དེའི་འཕྲུལ་དེབ་ དྲ་བ་འདི་ནས་ལེན་ཐུབ་པ་འདུག ཡང་ 1989 ལོར་ Pali Text Society ཞེས་པས་པར་བཏབ་པའི། “གནའ་བོའི་ནང་པའི་དགེ་སློང་མའི་སྙན་ངག་སྟེ། ཇོ་མོའི་གླུ་”(Poems of Early Buddhist Nuns: Therigatha)ཞེས་པ་འདི་ཡང་ལྕམ་ Caroline Augusta Foley Rhys Davids (1857-1942)ལགས་ཀྱི་དེབ་དེ་ཉིད་སླར་ཡང་བསྐྱར་པར་དུ་བཏབ་པ་ཞིག་ཡིན་པར་མངོན། ཡང་འགྱུར་འདི་ཉིད་པར་མ་དང་ཅུང་ཟད་མི་འདྲ་བ་ཞིག་དྲ་བ་འདིའི་སྟེང་ནས་མཇལ་ཐུབ། ཡང་། Susan Murcottཞེས་པས་བསྒྱུར་ཅིང་། Parallax པར་ཁང་གིས་ 1991 ལོར་པར་སྐྲུན་བྱས་པའི་ “ནང་པའི་བུད་མེད་ཐོག་མ་སྟེ། ཇོ་མོའི་གླུ་ཡི་འགྲེལ་པ་དང་འགྱུར་(First Buddhist Women: Translations and Commentary on the Therigatha)ཞེས་པ། པར་ཁང་དེ་ཉིད་ཀྱིས་ སླར་ཡང་༢༠༠༦ ལོར་ཁ་བྱང་དུ་ “ནང་པའི་བུད་མེད་ཐོག་མ་རྣམས། སངས་རྒྱས་པའི་ལོ་རྒྱུས་དང་སྙན་ངག་དག་” (First Buddhist Women: Poems and Stories of Awakening) ཞེས་པར་སྐྲུན་བྱས་ཡོད་པར་སྣང་ལ། ཕྲན་ལ་ཐོབ་པ་ནི་པར་མ་ཕྱི་མ་འདི་ཡིན། འོན་ཀྱང་འདིར་མ་ཡིག་ཏུ་འཁོད་པའི་སྙན་ངག་ཁག་བདུན་ཅུ་དོན་གསུམ་ལས་ཁག་བཅུ་གཉིས་བསྐྱུར་ཏེ་རེ་གཅིག་བསྒྱུར་པ་ཡིན་ཞེས་གསལ་བཤད་བྱས་འདུག དེ་དག་ཀྱང་སྙན་ངག་ལེའུ་བཅུ་གཉིས་ཀྱི་བདག་ཉིད་དུ་ཕྱེས་ཏེ་ལེའུ་རེ་རེར་སྙན་ཚོམས་དང་དེའི་ངོ་སྤྲོད་སོགས་སྤེལ་འདུག དཔེར་ན་ལེ་ཚན་དང་པོའི་ནང་སྐྱེ་དགུའི་བདག་མོ་ཆེན་མོ་ཉིད་ཀྱི་སྙན་ངག་དང་ངོ་སྤྲོད་སྤེལ་འདུག ད་དུང་འདིའི་གླེང་བརྗོད་དུ་འཁོད་པ་ལྟར་ན། སྙན་ཚོམས་འདིའི་མ་ཡིག་པཱ་ལིའི་སྐད་དུ་ཡོད་པ་དེ་དག་ནི་ཤོ་ལོ་ཀ་རེ་རེར་རྐང་པ་བཞི་དང་། རྐང་པ་རེ་རེར་ཚིག་འབྲུ་བརྒྱད་ཅན་ཡིན་འདུག སྙན་ཚོམས་འདི་དག་ནི་དུས་རབས་སམ་བརྒྱ་ཕྲག་དྲུག་གི་ཡུན་དུ་ངག་རྒྱུན་གྱི་ངོ་བོར་གནས་ཡོད་པ་དང་། སྤྱི་ལོའི་སྔོན་གྱི་བརྒྱ་ཕྲག་དང་པོའི་ནང་ཤྲི་ལང་ཀའི་ཡུལ་དུ་པཱ་ལིའི་སྐད་དུ་བྲིས་པ་ཡིན་འདུག

དྲ་ཐོག་ནས་རྙེད་པའི་ “ཇོ་མོའི་གླུ་”ཞེས་པའི་ཨིན་འགྱུར་མ་ཞིག་ལྟར་ན།  སྙན་ཚོམས་འདི་ལ་སྙན་ངག་ཁག་བདུན་ཅུ་དོན་གཉིས་དང་། ཚིགས་སུ་བཅད་པ་ ༥༢༢ ཡོད་པ་དང་། དེ་ནི་ཆེས་ཐོག་མའི་དགེ་སློང་མ་རྣམས་ཀྱིས་ཐར་པ་དོན་དུ་གཉེར་སྐབས་འཕྲད་པའི་དཀའ་སྡུག་དང་གྲུབ་འབྲས་ཀྱི་སྐོར་གླེང་བ་ཞིག་ཡིན་པ་རེད། ཚིགས་སུ་བཅད་པ་གཅིག་ཅན། ཟུང་ལྡན། གསུམ་ལྡན། བཞི་ཅན་སོགས་ནས་བརྩམས་ཏེ་ཚིགས་སུ་བཅད་པ་བཅུ་དྲུག་པའི་བར་ཏེ་ལེའུ་བཅུ་དྲུག་གི་བདག་ཉིད་ཅན་དུ་ཡོད་འདུག

ཡང་སྙན་ཚོམས་འདིའི་ངོ་སྤྲོད་དྲ་ཐོག་ན་ཡོད་པ་རྣམས་སུ། Therigatha ཞེས་པ་འགྲེལ་སྐབས། པཱ་ལིའི་སྐད་དུ་ theri ཞེས་པ་བུད་མེད་རྒན་པའམ་ཡང་ན་ཤེས་ཡོན་གྱིས་ཕྱུག་པའམ་བགྲེས་པའི་བུད་མེད་ཅེས་པར་གོ་བ་དང་།  gatha ཞེས་པ་ཚིགས་སུ་བཅད་པའམ་གླུ་སོགས་ལ་འཇུག་སྟབས་འདི་ནི་ “རྒན་མོའི་ཚིགས་སུ་བཅད་པ་”ཞེས་བསྒྱུར་པ་ཡང་ཡོད་ཅེས་གསུངས། སྙན་ཚོམས་འདི་དག་ནི་པཱ་ལིའི་སྐད་ཀྱི་མདོ་སྡེའི་སྡེ་སྣོད་ཀྱི་ཁོངས་སུ་བཅུག་ཡོད་པ་དང་། ད་ཆར་ང་ཚོས་ཤེས་ཐུབ་པའི་བུད་མེད་ཀྱི་རྩོམ་རིག་སྔ་གྲས་ཤིག་ཡིན་པར་བཤད། སྙན་ཚོམས་འདིར་འཁོད་པའི་ཚིག་ཕྲེང་མང་པོ་ཞིག་གིས་ཐར་པ་ཐོབ་རྒྱུར་ཕོ་མོ་འདྲ་མཉམ་ཡིན་པའི་ཚུལ་གསལ་པོར་བསྟན་ཡོད་པ་ཙམ་དུ་མ་ཟད། བྱིས་པ་ཤི་བའི་ཨ་མ་དང་། བཤང་འཚོང་མ། ཕྱུག་པོའི་བུ་མོ། ད་དུང་བཅོམ་ལྡན་འདས་རང་ཉིད་ཀྱི་མ་མ་སྟེ་སྐྱེ་དགུའི་བདག་མོའི་སྙན་ངག་སོགས་ཀྱང་ཚུད་ཡོད་ཅེས་བཤད་འདུག གཤམ་དུ་དྲངས་པ་ནི་བཅོམ་ལྡན་འདས་ཀྱི་མ་མའམ་མ་ཚབ་སྟེ་སྐྱེ་དགུ་བདག་མོའི་སྙན་ངག་ཅིག་རེད། མ་ཡིག་ནི་“ནང་པའི་བུད་མེད་ཐོག་མ་རྣམས། སངས་རྒྱས་པའི་ལོ་རྒྱུས་དང་སྙན་ངག་དག་”ཅེས་པ་ལས་བཏུས་ཤིང་། བོད་སྐད་དུ་ཕྲན་གྱིས་འཕྲལ་དུ་བསྒྱུར་པའོ།།

Homage to you Buddha,

best of all creatures,

who set me and many others

free from pain.

བདག་དང་བཅས་པའི་འགྲོ་བ་གཞན།།

སྡུག་བསྔལ་ནད་ལས་ཐར་མཛད་ཅིང་།།

འགྲོ་བ་རྣམས་ཀྱི་མཆོག་གྱུར་པ།།

བཅོམ་ལྡན་ཁྱེད་ལ་ཕྱག་འཚལ་ལོ།།

All pain is understood,

the cause, the craving is dried up,

the Noble Eightfold Way unfolds,

I have reached the state where everything stops.

སྡུག་བསྔལ་ཐམས་ཅད་རྟོགས་གྱུར་ཅིང་།།

དེ་རྒྱུ་སྲེད་པ་སྐམ་པར་གྱུར།།

འཕགས་ལམ་ཡན་ལག་བརྒྱད་གྲོལ་ནས།།

འགོག་པའི་གོ་འཕང་བདག་གིས་བརྙེས།།

I have been

mother,

son,

father,

brother,

grandmother;

knowing nothing of the truth

I journeyed on.

བདག་ནི་མ་དང་བུར་གྱུར་ཅིང་།།

ཕ་དང་སྤུན་དང་རྨོ་མོར་གྱུར།།

བདེན་པའི་ཟུར་ཙམ་མ་རྟོགས་པར།།

བདག་ནི་བསྟུད་མར་འཁྱམས་པར་གྱུར།།

But I have seen the Blessed One;

this is my last body,

and I will not go

from birth to birth again.

འོན་ཀྱང་བདག་གིས་སྟོན་མཆོག་མཇལ།།

འདི་ནི་བདག་ལུས་མཐའ་མ་ཡིན།།

ད་ནི་སླར་ཡང་སྐྱེ་བ་ནས།།

སྐྱེ་བར་བགྲོད་པ་བདག་མི་བྱེད།།

Look at the disciples all together,

their energy,

their sincere effort.

This is homage to the buddhas.

གཟིགས་དང་འཁོར་གྱི་ཚོགས་རྣམས་ལ།།

ཁོང་རྣམས་ཀྱི་ནི་སྟོབས་ལ་ལྟོས།།

རྩོལ་བ་ཟོལ་མེད་དག་ལ་ལྟོས།།

འདི་ནི་བཅོམ་ལྡན་མཆོད་པའོ།།

Maya gave birth to Gautama

for the sake of us all.

She has driven back the pain

of the sick and the dying.”

བདག་དང་བཅས་པའི་འགྲོ་བའི་སླད།།

སྒྱུ་མ་ཡུམ་གྱིས་གོ་ཏམ་བསྐྱེད།།

ནད་དང་འཆི་བའི་སྡུག་བསྔལ་དག།

སྒྱུ་མ་ཡུམ་གྱིས་བཟློག་པར་མཛད།།

 

ཡང་དྲ་ཐོག་ན་ཁ་བྱང་ལ་ https://www.shemtaia.com ཞུ་བ་ཞིག་འདུག་ཅིང་། དེར་སྙན་ཚོམས་འདིའི་མ་ཡིག་དང་འགྱུར་སོགས་ PDF ཐོག་ཕབ་ལེན་བྱེད་ཆོག་པ་འདུག